“Mançester Siti” rəhbərliyi heyətdə ciddi dəyişikliklər planlaşdırır

“Mançester Siti” komandanın kapitanı Kayl Uokerlə vidalaşmaq niyyətindədir.

İngiltərə mediasında yayılan xəbərə görə, 34 yaşlı sağ cinah müdafiəçisinin zəif çıxışı klubu belə addım atmağa məcbur edib.

Bildirilib ki, “şəhərlilər” mövsümün sonunda ulduz futbolçu üçün gələcək təklifləri nəzərdən keçirməyə hazırdır. Mankunianlar Kaylla yanaşı, daha bir neçə veteranla da yolları ayırmağı planlaşdırır.

Xatırladaq ki, “Mançester Siti” dekabrın 4-ü Premyer Liqa çərçivəsində “Nottingem Forrest”i 3-0 hesabı ilə məğlub edərək 7 görüş davam edən qələbəsiz seriyaya son qoyub. Komandanın zəif oyunu ilə əlamətdar olan bu dövrdə K.Uoker də inamsız təsir bağışlayırdı.

Qeyd edək ki, cari müqaviləsi 2026-cı ilədək olan Kayl Uoker 2017-ci ildən “Siti”nin şərəfini qoruyur. 53 milyon avroya “Tottenhem”dən cəlb olunan müdafiəçi 313 matçda “şəhərlilər”in formasını geyinib.

Komanda ilə 6 dəfə İngiltərə çempionu olan Kayl Liqa Kubokunda 4, FA Kuboku və Super Kubokda isə 2 dəfə qalib olub. Bundan başqa, o, Çempionlar Liqası, UEFA Super Kuboku və klublararası dünya çempionatında qələbə qazanıb.