Portuqaliyalı ulduz "Barselona" və ya "Atletiko"da oynayacaq

Avropa futbolunda yay transfer pəncərəsinin ən böyük tapmacalarından biri həll olunmaq üzrədir. Baku TV-nin "İdman" xəbərlərinə görə, müqavilə ilə "Atletiko Madrid"ə məxsus olan, lakin "Barselona"da icarə əsasında çıxış edən portuqaliyalı ulduz Joau Feliks gələn mövsüm ya "Barselona"da qalacaq, ya da "Atletiko"ya qayıdacaq. Futbolçunun gələcəyi ilə bağlı qərar hər iki klubun maliyyə vəziyyətindən və baş məşqçilərin taktiki planlarından asılıdır.

Məlumata əsasən, "Barselona" rəhbərliyi Feliksin performansından razı qalsa da, "Atletiko"nun tələb etdiyi yüksək transfer məbləği keçidi çətinləşdirir. Digər tərəfdən, Dieqo Simeone ilə münasibətləri gərgin olan futbolçunun Madridə qayıtma ehtimalı yalnız məşqçi dəyişikliyi və ya klubun onu satmaqda israrlı olması halında mümkündür. Videoda Feliksin hər iki klubdakı statistikası, agenti Xorxe Mendeşin apardığı gizli danışıqlar və Kataloniya klubunun təklif etdiyi "yeni icarə" ssenarisi təhlil olunur.