“Mançester Yunayted”in növbəti zəfəri, “Barsa”nın fiaskosu

İngiltərə Liqa kubokunda qalibin adına aydınlıq gəlib. Yarışın finalında “Mançester Yunayted” və “Nyukasl” komandaları qarşılaşıb.

Oyunda hesabı “qırmızı şeytanlar” açıblar. Kazemiro fərqlənib. 6 dəqiqə sonra “sağsağanlar” 2-ci dəfə görüşə mərkəzdən başlamağa məcbur olublar. Əla formada olan Markus Reşford “mankunianlar”ın üstünlüyünü 2 topa çatdırıb. Qalan vaxtda başqa qol olmayıb və 2-0 hesablı qələbə qazanan “Yunayted” tarixində 6-cı dəfə Liqa kubokuna yiyələnib.

Premyer liqada 25-ci turun mərkəzi matçı “Tottenhem” və “Çelsi” arasında olub. London derbisi “mahmızlar”ın zəfəri ilə yekunlaşıb. İlk hissəsi qolsuz yekunlaşan görüşdə “Tottenhem” fasilədən sonra 2 qol vurub. 46-cı dəqiqədə Oliver Skipp, 82-ci dəqiqədə isə Harri Keyn topu qapıdan keçirib. Beləliklə, 2-0 hesabı ilə güclü olan Şimali London klubu xallarının sayını 45-ə çatdırıb və 4-cü yerdədir. Bütün yarışlarda 6 qarşılaşmadır qələbəyə həsrət olan “Çelsi” isə 31 xalla 10-cudur.

La liqada 23-cü turun gözlənilməz nəticəsi “Almeriya”da qeydə alınıb. Eyniadlı komandanın qonağı olan “Barselona” azarkeşlərini məyus edib. Matçın taleyini El-Bilal Turenin 24-cü dəqiqədə vurduğu yeganə qol həll edib. “Almeriya” - “Barselona”: 1-0.

Cari mövsüm çempionatda 2-ci dəfə uduzan “blauqrana” 59 xalla liderliyini davam etdirir. Komanda ən yaxın izləyicisi “Real”ı 7 xal qabaqlayır. 25 xalı olan “Almeriya” isə 15-cidir.