Milli komandamızın üzvü Türkiyə klubu ilə vidalaşıb

Milli komandamızın üzvü Ramil Şeydayev “Kocaelispor”dan ayrılıb.

Bu barədə klubun mətbuat xidmətindən məlumat verilib.

28 yaşlı futbolçunun müqaviləsinə qarşılıqlı razılıq əsasında xitam verilib. Türkiyə təmsilçisi Ramilə təşəkkür edib və ona gələcək karyerasında uğurlar arzulayıb.

Qeyd edək ki, Ramil bu ilin yanvarından “Kocaelispor”da top qovurdu. 800 min avroya Tailandın “Buriram Yunayted” klubundan cəlb olunan R.Şeydayev 16 matçda meydana çıxıb və 1 qol vurub.

Əlavə edək ki, təcrübəli forvard daha əvvəl ölkəmizdə “Sabah” və “Qarabağ” komandalarında forma geyinib. “Köhlən atlar”la 3 dəfə Azərbaycan çempionu olan oyunçu 2022-ci ildə isə ölkə Kubokunda qalib gəlib.

Maraq üçün deyək ki, Ramil Şeydayevin karyerasını “Neftçi”də davam etdirəcəyi iddia olunur. Belə ki, hücum xəttini gücləndirmək istəyən paytaxt komandası forvardın dəvətini nəzərdən keçirir.