Milli mətbuatın 150 illiyi münasibətilə Azərbaycan Velosiped İdmanı Federasiyası yarış təşkil etdi

Azərbaycan milli mətbuatının 150 illiyi münasibətilə Azərbaycan Velosiped İdmanı Federasiyası Kütləvi İnformasiya Vasitələrinin nümayəndələri arasında velosiped yarışı təşkil edib.

Veloparkda keçirilən tədbirdə 40-a yaxın media nümayəndəsi öz fiziki hazırlığını və idmana olan marağını nümayiş etdirib.

Əvvəlcə yarımfinal yürüşləri keçirilib və finalçılar müəyyənləşib. Həlledici mərhələdə qadınlar arasında Nazilə Əhmədova bütün rəqiblərini qabaqlamaqla yarışın qalibi olub.

“Baku TV”nin əməkdaşı Aysu Haqverdiyeva 2-ci, Vüsalə Səid isə 3-cü olub.

Kişilər arasında Feyruz Rəhimov fəxri kürsünün ən yüksək pilləsinə qalxıb. “Baku TV”nin əməkdaşı Abbas Nəsirov və Ümid Süleymanov müvafiq olaraq 2 və 3-cü yerləri tutublar.

Yarışda fərqlənən media nümayəndələrinə mükafatları Azərbaycan Velosiped İdmanı Federasiyasının prezidenti Zaur Axundov təqdim edib.

Tədbirin bütün iştirakçılarına xatirə sertifikatları verilib.

Tədbir çərçivəsində Azərbaycan velosiped idmanı üzrə yığma komandanın yeni formasının təqdimatı da olub.