“Napoli” və “Milan”ın qalib gəldiyi turda “İnter” məğlub oldu

İtaliya çempionatında 6-cı turun gözlənilməz nəticəsi “Cuzeppe Meatsa” arenasında qeydə alınıb.

“Sassuolo”nu qəbul edən “İnter” doğma meydanda məğlub olub. Hərçənd ki, ilk hissə Dumfrisin qolu sayəsində “neradzurri”nin üstünlüyü ilə yekunlaşıb. Ancaq “Sassuolo” Nedim Bayrami və Domeniko Berardinin qolları ilə dönüş edərək 2-1 hesablı qələbə qazanıb.

“İnter”dən fərqli olaraq son çempion “Napoli” azarkeşlərini sevindirib. 3 oyundur qalibiyyətə həsrət olan neapollular doğma meydanda “Udineze”ni 4-1 hesabı ilə məğlub ediblər.

“Napoli”dən Zelinski, Osimhen, Kvaratsxeliya və Simeonenin qollarına, qonaqlar yalnız Samarciçin topu ilə cavab veriblər.

Qeyri-sabit nəticələrlə diqqət çəkən “Latsio” da turu 3 xalla tamamlayıb. “Torino”nu qəbul edən “byankoselesti” Vesino və Dzakanyinin qolları sayəsində 2-0 hesabı ilə güclü olub.

Çempionluq yarışının daha bir iştirakçısı “Milan” isə 3 xalı 3 qolla qazanıb. Kalyari səfərində eyni adlı komanda ilə üz-üzə gələn “rossoneri” 29-cu dəqiqədə geriyə düşsə də, vəziyyəti dəyişə bilib. “Milan”ın heyətində Okafor, Tomori və Loftus-Çikin zərbələri dəqiq alınıb.

Bu nəticələrdən sonra 15 xalı olan “Milan” əzəli rəqibi “İnter”lə birlikdə 1-ci, 2-ci yerləri bölüşdürür. 2 xal geri qalan “Yuventus” 3-cü yerdədir. Skudettonun son sahibi “Napoli” isə 11 xalla 5-cidir.