“Neftçi” basketbolçuları 14-cü turu qələbə ilə başa vurub

“Neftçi” klubu Basketbol Liqasında növbəti görüşünü keçirib.

14-cü turda “Sərhədçi” komandası ilə üz-üzə gələn “ağ-qaralar” ilk periodu 14-17 hesabı ilə geridə tamamlayıb. Bununla belə, böyük fasilə ərəfəsində vəziyyət dəyişib.

2-ci hissədə daha yaxşı təsir bağışlayan “Neftçi” 36-28 hesablı üstünlük əldə edib. 3-cü periodda fərq dəyişməyib: 58-50.

Son hissədə də inamlı çıxış edən “ağ-qaralar” yekunda 82-67 hesablı qələbə qazanıblar. “Neftçi”nin uğurunda 18 xal və 14 ribaundla yadda qalan Hendriks Vante Rouz əsas pay sahibi olub.

Bu nəticədən sonra “Neftçi”nin aktivində 20 xal var. Komanda eyni sayda xal toplayan “Abşeron”la Liqanın A qrupunda 3-cü, 4-cü pillələri bölüşdürür. Klublar lider “Naxçıvan”dan 4 xal geri qalır.

Qeyd edək ki, “Neftçi” kollektivi növbəti turda “Abşeron” basketbolçuları ilə qarşılaşacaq.