“Neftçi” Premyer Liqada getdikcə daha inamlı təsir bağışlayır

Azərbaycan Premyer liqasının 14-cü turu “Neftçi”nin növbəti qələbəsi ilə əlamətdar olub.

Samir Abasovun baş məşqçi təyin olunmasından sonra tədricən vəziyyəti düzəldən “ağ-qaralar” bu dəfə iddialı “Zirə” üzərində qələbə qazanıb.

“Neftçi Arena”da keçirilən və 2-1 hesabı ilə bitən matçda meydan sahiblərinin qollarını Filip Ozobiç və Emil Səfərov vurublar. Bununla da “Neftçi” növbəti turda baş tutacaq “Qarabağ”la oyun ərəfəsində vacib qalibiyyət əldə edib.

Çempionata uğursuz başladıqdan və yeni çalışdırıcının gəlişindən sonra getdikcə daha inamlı görünən “ağ-qaralar” hazırda 8-ci pillədə qərarlaşıb. 13 xalı olan paytaxt klubu 7-ci yerdəki “Şamaxı” ilə eyni sayda xal toplasa da, əlavə göstəricilərə görə geridədir. Bununla belə, komandanın oyununda inkişaf göz qabağındadır.

Çempionatın startı ilə müqayisədə rəqib qapısı qarşısında daha soyuqqanlı görünən “Neftçi” futbolçuları Premyer liqadakı son 2 görüşdə 4 qolla yadda qalıblar. Bu isə dekabrın 1-i son çempion “Qarabağ”a qarşı keçiriləcək oyunun bir qədər də maraqlı alınacağından xəbər verir. Matçın “Neftçi Arena”da baş tutacağını da nəzərə alsaq, meydan sahiblərinin sona qədər mübarizə aparacağına şübhə yoxdur.