“Neftçi” transfer hazırlıqlarını davam etdirir

2024/25-ci illər mövsümü üçün hazırlığa start verən “Neftçi” yeni transferlər üzərində işləməyə davam edir.

“Ağ-qaralar” artıq iki yeni futbolçunu heyətə cəlb ediblər.

Komandaya gələn oyunçulardan biri monteneqrolu Edvin Kuçdur. Paytaxt təmsilçisi 30 yaşlı yarımmüdafiəçi ilə 2 illik müqavilə imzalayıb. “Neftçi”yə yeni qoşulan digər futbolçu isə millimizin üzvü Emil Səfərovdur. 21 yaşlı yarımmüdafiəçi klubla 2 illik sözləşməyə qol çəkib.

Qeyd edək ki, “Neftçi” yeni mövsüm ərəfəsində baş məşqçi postunda da dəyişiklik edib. Miodraq Bojoviçlə yollarını ayıran “ağ-qaralar” bu vəzifəyə Roman Qriqorçuku təyin ediblər. Ukraynalı mütəxəssis artıq paytaxt komandasında məşqlərə start verib.

Xatırladaq ki, ötən mövsüm Premyer Liqada 56 xal toplayan “Neftçi” yekunda 5-ci pillənin sahibi olub. Ölkə Kubokunda isə kollektiv mübarizəni yarımfinal mərhələsində dayandırıb.