Olimpiya Oyunlarında medal qazanan idmançılarımız vətənə qayıtdılar

Paris-2024 Yay Olimpiya Oyunlarında uğurlu çıxışla yeni rekord vuran Azərbaycan millisi Vətənə qayıdıb. İdmançılar Heydər Əliyev Beynəlxalq Aeroportunda qarşılanma mərasimində jurnalistlərə açıqlama veriblər.

Olimpiadada gümüş medal qazanan Azərbaycan taekvondoçusu Qaşım Maqomedov idmanın onun həyatında mühüm rol oynadığını vurğulayıb:

“İdman mənim həyatımdır. İndiyədək sərf etdiyim əmək, zəhmət öz bəhrəsini verdi. Olimpiya Oyunlarının gümüş medalı – bu, bir zarafat deyil. 10 ilə yaxındır buradayam. Olimpiya Oyunlarında Azərbaycan bayrağını dalğalandırdığım üçün fəxr edirəm”.

Olimpiadada digər gümüş medalın sahibi Azərbaycan boksçusu Alfonso Dominqes ona hər zaman dəstək olduğu üçün millətimizə təşəkkür edib:

“Azərbaycan mənə Paris-2024 Yay Olimpiya Oyunlarında iştirak etməyim üçün şərait yaradıb. Odur ki, hər zaman bayrağımızı yüksəklərdə dalğalandıracağam. Azərbaycan xalqının mənə göstərdiyi etimadın əvəzini medalla çıxıram”.