Ölkəmizin cüdo məşqçiləri beynəlxalq proqramda iştirak edir

Bakıda Beynəlxalq Cüdo Federasiyası Akademiyasının məşqçilik və sertifikat proqramı üzrə açılış mərasimi keçirilib.

Cüdo üzrə milli komandaların təlim-məşq mərkəzində təşkil olunan tədbirə federasiya və Milli Olimpiya Komitəsinin nümayəndələri, eyni zamanda xarici ekspertlər qatılıblar.

Mərasimdə çıxış edən Akademiyanın direktoru Envik Qalea ölkəmizin müasir standartlara cavab verən cüdo üzrə təlim-məşq mərkəzinə sahib olduğunu və bunun uğurlu nəticələr qazanmaq üçün vacibliyindən danışıb.

Azərbaycan Cüdo Federasiyasının baş katibi Rəşad Rəsullu isə məşqçilərin və idmançıların təhsilinin cüdo fəlsəfəsinin əsas prinsipini təşkil etdiyini vurğulayıb.

Qeyd edək ki, Azərbaycan Cüdo Federasiyası və Milli Olimpiya Komitəsinin birgə təşkilatçılığı ilə keçirilən sözügedən seminarda uğur qazananlara xüsusi sertifikatlar təqdim olunacaq.