Paytaxtımızda cüdo üzrə “Böyük Dəbilqə” yarışına start verilib

Bakıda keçirilən və Milli Gimnastika Arenasında təşkil olunan cüdo üzrə “Böyük Dəbilqə” turnirinin rəsmi açılış mərasimi baş tutub.

Tədbirdə gənclər və idman nazirinin müavini Mariana Vasileva, Azərbaycan Cüdo Federasiyasının vitse-prezidenti Rəşad Nəbiyev və Beynəlxalq Cüdo Federasiyasının prezidenti Mauris Vizer iştirak ediblər.

Çıxış edənlər ölkəmizin cüdoda böyük ənənələrə malik olduğunu və son illərdə bu idman növünün inkişafı istiqamətində vacib addımlar atıldığını diqqətə çatdırıblar.

Yarış iştirakçılarını salamlayan Beynəlxalq Cüdo Federasiyasının prezidenti Mauris Vizer turnirin yüksək səviyyədə təşkil olunduğunu vurğulayaraq yarışın maraqlı idman mübarizəsi şəraitində keçəcəyinə ümidvar olduğunu deyib.

Rəsmi çıxışların ardınca Azərbaycan Respublikasının Dövlət Himni səsləndirilib. Daha sonra “Böyük Dəbilqə” turnirində mübarizəyə start verilib.

Qeyd edək ki, paytaxtımızda təşkil olunan mötəbər yarışda 62 ölkədən 404 idmançı qüvvəsini sınayır. Fevralın 18-dək davam edəcək turnirdə ölkəmiz 33 idmançı ilə təmsil olunur.