Paris-2024 Paralimpiya Oyunlarının bağlanış mərasimi olub

09 sentyabr 2024 466 baxış

Fransanın paytaxtı Parisdə keçirilən XVII Paralimpiya Oyunlarının təntənəli bağlanış mərasimi keçirilib.

“Stad de Frans”da təşkil olunan tədbirdə ölkəmizin bayraqdarları Səid Nəcəfzadə və Lamiyə Vəliyeva olublar.

Qeyd edək ki, idmançılarımız sözügedən turniri 4-ü qızıl, 2-si gümüş və 5-i bürünc olmaqla ümumən 11 mükafatla tamamlayıblar. Təmsilçilərimizdən dünya rekordçusu Lamiyə Vəliyeva 100 metr məsafəyə qaçışda, Səid Nəcəfzadə və Orxan Aslanov uzunluğa tullanmada, İmaməddin Xəlilov isə parataekvondoda qızıl medal qazanıblar. Digər nümayəndələrimizdən Raman Saley paraüzgüçülükdə 1 gümüş və 2 bürünc mükafata yiyələnib.

Daha bir paraüzgüçümüz Vəli İsrafilov, eləcə də parataekvondoçu Sabir Zeynalov və paracüdoçu İlham Zəkiyev də Parisdəki yarışı bürünc medalla tamamlayıblar. Bundan başqa, Lamiyə Vəliyeva 400 metr məsafəyə qaçışda fəxri kürsünün 2-ci pilləsinə qalxıb.

#Paris-2024 Yay Paralimpiya Oyunları