Pele ilə vida mərasimi başa çatıb

Braziliyanın Santos şəhərinin Vila Belmiro stadionunda futbol üzrə üçqat dünya çempionu Pele ilə vida mərasimi başa çatıb.

Dəfn korteji anım mərasiminin keçirildiyi stadiondan uzaqlaşıb. Mərasimin sonunda Pelenin nəşi olan tabut alqış sədaları altında yanğınsöndürən maşınının damına qaldırılıb və Braziliya bayrağı ilə örtülüb.

Dəfn korteji hərbi polis motosikletçilərinin fəxri müşayiəti ilə Santos küçələrindən, o cümlədən onun 100 yaşlı anasının hələ də yaşadığı evin yanından keçəcək. Bundan sonra Pele onun özünün seçdiyi “Ekumenika” nekropolunun ərazisində, stadionun yaxınlığında yerləşən məqbərədə dəfn olunacaq.

Məlumata görə, bir gündə Pele ilə vidalaşmağa 150 mindən çox insan gəlib. Stadiona bitişik küçələr mərhum futbolçunun xatirəsini yad etməyə gələn insanlarla dolu olub, növbənin uzunluğu 2, 3 km-ə çatıb, insanlar 3 saatdan çox orada dayanıblar.

Qeyd edək ki, üçqat dünya çempionu Pele ötən il dekabrın 29-da 82 yaşında vəfat edib.