“Qalatasaray”ın ulduzu karyerasını İngiltərədə davam etdirəcək

“Qalatasaray”ın italiyalı ulduzu Nikolo Zanyolo karyerasını İngiltərədə davam etdirəcək.

Bu barədə məşhur insayder Fabritsio Romano məlumat verib. Bildirilir ki, 24 yaşlı yarımmüdafiəçi “Aston Villa” klubu ilə anlaşıb.

Son xəbərlərə əsasən, Premyer Liqa təmsilçisi Zanyolonu icarə əsasında heyətinə qatacaq. Buna görə Türkiyə kollektivinə 4 milyon avro ödəniləcək. Tərəflər arasında razılığa əsasən Birmingem komandası 22 milyon avro qarşılığında Zanyolonun transfer hüquqlarına tam olaraq yiyələnə bilər.

Qeyd edək ki, bu ilin fevralında “Roma”dan 15 milyon avroya “Qalatasaray”a keçən Zanyolo 12 oyunda 5 qola imza atıb. İstanbul təmsilçisi ilə Türkiyə çempionu olan Nikolo 2019-cu ildən İtaliya millisinə də dəvət olunur. “Skuadra Adzurra”nın heyətində 13 görüşə qatılan futbolçu 2 qolla yadda qalıb.