"Beşiktaş" rəhbərliyi bu futbolçunu klubdan göndərir

“Beşiktaş” klubu Çiro İmmobile ilə vidalaşmağa hazırlaşır.

Türkiyə mediasında yayılan məlumata görə, “qara qartallar” artıq onu əvəzləyə biləcək hücumçu axtaraşına başlayıblar.

Son xəbərlərə əsasən, mövsümün startında 2 milyon avroya “Latsio”dan cəlb olunan italiyalı forvardın çıxışı İstanbul nəhəngini qane etmir. Çiro cari mövsümdə 31 matçda 14 qolla yadda qalsa da, klubun rəsmiləri İmmobile ilə yolları ayırmağı qərara alıblar. “Ağ-qaralar” onun yerinə “Volfsburq”un danimarkalı hücumçusu Yonas Vindin dəvətini nəzərdən keçirir. Bu oyunçu cari mövsümdə bütün yarışlarda 27 görüşdə 10 qol vurub.

Qeyd edək ki, “Beşiktaş”la müqaviləsi 2026-cı ilədək olan İmmobile daha əvvəl “Latsio” ilə yanaşı, İtaliyanın “Yuventus”, “Peskara”, “Cenoa” və “Torino” klublarında, habelə Almaniyanın “Borussiya Dortmund” və İspaniyanın “Sevilya” komandalarında forma geyinib.