"Neftçi" Basketbol liqasında "Sabah"a qalib gəlib

Basketbol üzrə Azərbaycan liqasında 14-cü tura start verilib. İlk görüşdə “Sabah” və “Neftçi” kollektivləri üz-üzə gəliblər.

“Sərhədçi” İdman Olimpiya Mərkəzində keçirilən qarşılaşma “ağ-qaralar”ın qələbəsi ilə yekunlaşıb. İlk periodda 23-22 hesabı ilə güclü olan “Neftçi” böyük fasilə ərəfəsində fərqi artırıb: 51-43.

Sonrakı hissələrdə də üstünlüyünü qoruyan “Neftçi” yekunda 101-87 hesablı qalibiyyət əldə edib. “Ağ-qaralar”ın uğurunda aktivinə 25 xal və 6 ribaund yazdıran Alfonso Villis vacib rol oynayıb.

Bundan başqa, görüş “Sabah”ın yeni baş məşqçisi Rimas Kurtinaytisin rəhbərliyi ilə ilk dəfə uduzması ilə əlamətdar olub.

Qeyd edək ki, qələbədən sonra 25 xalı olan “Neftçi” hazırda “Xəzri” kollektivi ilə 2-ci, 3-cü yerləri bölüşdürür. Komandalar mövsümdə 3-cü dəfə məğlub olan lider “Sabah”dan 1 xal geri qalır.