"Pari Sen Jermen” Kilian Mbappeni əvəzləyəcək futbolçunu tapdı

Müqaviləsini uzatmaq istəməyən Kilian Mbappe ilə vidalaşmağı planlaşdıran “Pari Sen-Jermen” onu əvəzləyə biləcək futbolçunu tapıb.

Fransa mətbuatında yayılan məlumata görə, Paris təmsilçisi “Barselona”nın üzvü Usman Dembeleni heyətə qatmaq istəyir. Bildirilir ki, Usmanın sözləşməsində 50 milyon avroluq sərbəst qalmaq bəndi var və PSJ bundan yararlanmaq niyyətindədir.

Daha bir xəbərə əsasən, “Barselona” Mbappenin transferi qarşılığında Dembele ilə yanaşı, Qavinin də Fransa nəhənginə keçməsinə razılıq verməyə hazırdır. Oyunçuların bu vəziyyətdə hansı qərar verəcəyi isə hələ ki məlum deyil.

Qeyd edək ki, PSJ ilə müqaviləsi gələn yayadək nəzərdə tutulan Kilian Mbappe yeni mövsümü Parisdə keçirməyi planlaşdırır. Bu halda o yüksək məvaciblə yanaşı, həm də kluba sadiqlik bonusunu qazanacaq. PSJ isə sözləşməsini uzatmaqdan imtina edən futbolçuya ödəniş etmək istəmir. Yaranan vəziyyətdə prezident Nasser Əl-Helaifi oyunçunu avqustun sonunadək başqa komandaya keçməyə məcbur etmək niyyətindədir.