“Real Madrid” daha bir ulduz futbolçu transferinə hazırlaşır

Heyətini gücləndirmək üçün daim yeni ulduz futbolçular axtarışında olan “Real Madrid”in növbəti hədəfi məlum olub.

“Kral klubu” “Bayer”in istedadlı oyunçusu Floryan Virtsi transfer etmək istəyir.

Almaniya mediasında yayılan xəbərə görə, “los blankos” 21 yaşlı yarımmüdafiəçi ilə bu yay müqavilə imzalamaq niyyətindədir. Lakin bunun üçün əvvəlcə Leverkuzen təmsilçisinin razılığını almaq lazımdır.

Komandanın liderlərindən olan Floryanı itirmək istəməyən “Bayer” onu növbəti mövsümdə də kollektivdə saxlamağı planlaşdırır.

Bundan başqa, keçidə futbolçunun yüksək transfer qiyməti mane ola bilər. Belə ki, “transfermarkt” portalına əsasən, Virtsin dəyəri 110 milyon avrodur. Almaniya klubunun isə ona görə azı 150 milyon avro tələb edəcəyi bildirilir.

Qeyd edək ki, “Bayer”in yetirməsi olan Floryan Virts cari mövsümdə leverkuzenlilərin Bundesliqanı qazanmasında əsas pay sahiblərindəndir. 31 tur ərzində 11 qol və 11 assistlə diqqət çəkən yarımmüdafiəçi avrokubokda da inamlı təsir bağışlayır. Avropa liqasında 9 matça çıxan futbolçu 4 qol və 4 məhsuldar ötürmə müəllifidir.