Ronaldo “Real”a, Messi isə “Barsa”ya qayıtmaq istəyir

Ötən ilin son günlərində “Əl-Nəsr”lə müqavilə imzalayaraq futbol tarixinin ən qeyri-adi keçidlərindən birinə imza atan Kriştiano Ronaldo “Real Madrid”ə qayıtmaq istəyir.

İspaniya mediasında yayılan xəbərə görə, məvacib və sponsorlardan əldə olunan gəlirlər də nəzərə alınmaqla illik 200 milyon avro qazanan portuqaliyalı ulduz Səudiyyə Ərəbistanında özünü xoşbəxt hiss etmir.

Bir müddət əvvəl isə 38 yaşlı veteranın ölkədən deportasiya oluna biləcəyi bildirilirdi. Buna səbəb Kriştianonun “Əl Hilal” azarkeşlərinin “Messi, Messi” şüarına qeyri-etik cavabıdır. K.Ronaldonun bu hərəkəti Səudiyyə Ərəbistanında böyük qalmaqala səbəb olsa da, klub açıqlama yayaraq oyunçunun zədələndiyi üçün belə etdiyini bildirmişdi.

Qeyd edək ki, “Əl-Nəsr”dən ayrılaraq karyerasının ən gözəl illərini keçirdiyi “Real”a dönmək istəyən Kriştiano hətta yüksək gəlirdən də imtina etməyə hazırdır. Son məlumata görə, “kral klubu”nun prezidenti Florentino Peres də Kriştianonun qayıdışına qarşı çıxmaq niyyətində deyil. Lakin 76 yaşlı funksioner K.Ronaldonu futbolçu kimi yox, “Real”ın səfiri qismində görmək istəyir.