Şəhid jurnalistlərin xatirəsinə həsr olunan futbol turniri yekunlaşıb

18 Oktyabr Müstəqilliyin Bərpası və 8 Noyabr Zəfər Günü münasibətilə ölkəmizin şəhid jurnalistlərinin xatirəsinə həsr olunan həvəskar komandalardan ibarət 3-cü ənənəvi futbol turniri başa çatıb.

Bakı Tennis Akademiyasında keçirilən yarışda ilk olaraq “Gənclər 2020” və “Turan” komandaları 3-cü yer uğrunda matçda üz-üzə gəlib. 5:4 hesablı qələbə qazanan “Turan” bürünc medalın sahibi olub.

Final görüşündə isə “Ardanış” və “Göyçə” kollektivləri qarşılaşıb. 1-2 hesabı ilə qalib güclü olan “Göyçə” komandası kuboku qazanıb.

Final qarşılaşmasından sonra isə bağlanış mərasimi təşkil olunub. Xatirə turnirində qalib komandalara kubok, medal və xatirə hədiyyələri verilib.

Qeyd edək ki, bu yarışın keçirilməsində əsas məqsəd I və II Qarabağ savaşında canlarını fəda edən mərd mübarizlərin xatirəsini anmaq, 44 günlük Vətən müharibəsi iştirakçılarının qəhrəmanlıq nümunələrini yaşatmaq, eləcə də yeni nəslin sağlam ruhda vətənpərvər böyüməsinə töhfə verməkdir.