Tokioda qızıl medal qazanan idmançılarımız mükafatlandırıldı

Karatenin kudo növü üzrə Yaponiyada keçirilən dünya çempionatında qızıl medal qazanan idmançılarımız – Sevinc Mövsümzadə və Vüsal Əliyev mükafatlandırılıblar.

Bununla əlaqədar təşkil olunan tədbirdə Azərbaycan Koşiki-do Karate Federasiyasının fəxri prezidenti Adnan Əhmədzadə, federasiya prezidenti Rafael Bünyatov, federasiya nümayəndələri və məşqçilər iştirak ediblər. Tokioda baş tutan dünya çempionatında qalib gələn idmançılarımızı təbrik edən federasiya rəsmiləri onlara gələcək yarışlarda uğurlar arzulayıblar.

Bundan başqa, idmana və idmançılara daim diqqət və qayğı ilə yanaşan Prezident İlham Əliyevə, habelə gənclər və idman naziri Fərid Qayıbova və Azərbaycan Karate Federasiyaları Assosiasiyasının prezidenti Ülvi Quliyevə minnətdarlıq bildirilib.

Qeyd edək ki, Yaponiyada baş tutan dünya çempionatında ölkəmizi layiqincə təmsil edən idmançıların mükafatlandırılmasından sonra xatirə şəkli çəkdirilib.