Top-5 çempionatlarda maraqlı oyunlar olub

Premyer liqada çempionluq mübarizəsini davam etdirən “Liverpul” 34-cü turda “Fulhem”in qonağı olub.

Londonun “Kreyven Kottec” stadionundakı görüşdə 4 qol vurulub.

“Qırmızılar”dan fasiləyədək Trent Aleksander-Arnold, 2-ci yarıda isə Rayan Qravenberx və Dioqu Jota fərqləniblər. “Fulhem”in yeganə qolu isə Timoti Kastanın aktivindədir.

3-1 hesablı qələbə sayəsində xallarının sayını 74-ə çatdıraraq “Arsenal”la bərabərləşən “Liverpul” “topçular”la 1-ci, 2-ci yerləri bölüşdürür.

Çempionlar liqasında “Barselona”ya qalib gələrək yarımfinala yüksələn PSJ liqa 1-də də azarkeşlərini sevindirib. “Lion”u qəbul edən parislilər 4-1 hesablı qələbə qazanıblar. Paytaxt klubunun heyətində dubl edən Qonsalu Ramuşla yanaşı, Lukas Beraldo fərqlənib.

Daha bir epizodda isə “Lion”un üzvü Nemanya Matiç avtoqolla yadda qalıb. Bu nəticədən sonra 66 xalla zirvədə olan PSJ 2-ci yerdəki “Monako”nu 11 xal qabaqlayır.

Bundesliqada vaxtından əvvəl çempion olan “Bayer” 30-cu turda Dortmund “Borussiya”sı ilə görüşdə həyəcanlı anlar yaşayıb. “Siqnal İduna Park” arenasındakı qarşılaşmada Niklas Fülkruqun qolundan sonra geriyə düşən leverkuzenlilər bərabərlik topunu əsas vaxta artırılan 7-ci dəqiqədə vurublar. Yosip Stanişiç Xabi Alonsonun komandasını xilas edib. 1-1 hesabı ilə bitən matçdan sonra “Bayer”in bütün yarışlarda məğlubiyyətsizlik seriyası 45 oyuna çatıb.