Türkiyə Superliqasında qalibin adına aydınlıq gəlib

Futbol üzrə Türkiyə Superliqasında qalibin adına aydınlıq gəlib.

Sonuncu – 38-ci turun həlledici qarşılaşmasında “Qalatasaray” klubu “Konyaspor”un qonağı olub.

Görüş “sarı-qırmızılar”ın 3-1 hesablı qələbəsi ilə yekunlaşıb. 29-cu dəqiqədə Mauro İkardi azarkeşləri sevindirib. İlk hissə bu hesabla yekunlaşıb.

İkinci yarıda İstanbul təmsilçisi daha bir topu konyalıların qapısından keçirib. 51-ci dəqiqədə M.İkardi dubl edib. Cəmi 2 dəqiqə sonra fərq 3-ə çatıb. Bu dəfə Berkan Kutlu hədəfi dəqiq nişan alıb: 0-3.

78-ci dəqiqədə “Konyaspor” toplardan birinin əvəzini çıxsa da, bu, sadəcə təsəlli olub. Yekunda bu qələbə ilə xallarının sayını 102-yə çatdıran “Qalatasaray” ardıcıl 2-ci, ümumən isə tarixində 24-cü dəfə Türkiyə çempionu olub.

Qeyd edək ki, paralel keçən görüşdə “Fənərbağça” autsayder “İstanbulspor”u 6 cavabsız qolla məğlub edərək xallarının sayını 99-a çatdırsa da, əzəli rəqibi “Qalatasaray”ın qələbəsi səbəbindən cari mövsümü gümüş medalla kifayətlənməli olub.