Türkiyəli aşpaz Nüsrət Gökçe ilə bağlı araşdırma başlayıb

Nusret Gökçe FİFA-nın da qəzəbinə tuş gəlib. Ali futbol qurumu məşhur aşpazın Qətərdəki mundialın final oyunundan sonra meydana icazəsiz daxil olması ilə əlaqədar araşdırmaya başlayıb.

İngiltərənin BBC telekanalına danışan FİFA rəsmilərindən biri mükafatlandırılma mərasimindən sonra yad şəxslərin icazəsiz olaraq meydana enməsinin qəbuledilməz olduğunu deyib. O bununla əlaqədar ciddi araşdırmaya başladıqlarını və belə halın yaranmasına şərait yaradan personalın cəzalandırılacağını bildirib.

Qeyd edək ki, Argentina-Fransa matçından sonra meydanda şəkil çəkdirən Nusret Gökçe bununla da kifayətlənməyərək dünya kubokunu əlinə alıb. Bu isə FİFA-nın qaydalarına əsasən qadağandır. Kuboka yalnız turnirin qalibləri, təşkilatın rəsmiləri və dövlət başçıları toxuna bilər.