UEFA-nın Merih Demiralla bağlı qərarı açıqlandı

Türkiyə millisinin üzvü Merih Demiral UEFA tərəfindən cəzalandırılıb.

Buna səbəb müdafiəçinin Avstriya ilə matçda fərqləndikdən sonra qol sevincidir.

Belə ki, M.Demiral rəqibin qapısına yol tapdıqdan sonra "bozqurd" işarəsini göstərib. Bununla əlaqədar araşdırma aparan UEFA isə yekunda futbolçunu 2 oyunluq cəzalandırıb. Beləliklə, Merih yalnız “ay-ulduzlular”ın finala adlayacağı təqdirdə yarışda meydana çıxacaq.

Xatırladaq ki, AVRO-2024-ün 1/8 finalında Avstriya ilə qarşılaşma Türkiyə yığmasının 2-1 hesablı qələbəsi ilə bitib. Dubl edən Merih Demiral isə komandanın uğurunda əsas pay sahibi olub.

Bu nəticədən sonra 1/4 finala adlayan Türkiyə seçməsi Niderland kollektivinə rəqib olub. Yarımfinalçını müəyyənləşdirəcək oyun iyulun 6-sı Berlinin “Olimpiyaştadion” arenasında keçiriləcək. Görüşün baş hakimi isə fransalı Kleman Türpen olacaq.