UFC-də Pyotr Yan və Merab Dvalişvili arasında döyüş baş tutub

Amerika Birləşmiş Ştatlarında UFC-nin növbəti turniri keçirilib.

Las-Veqas şəhərində baş tutan “UFC Fight Night 221” yarışının əsas döyüşündə 61 kq-dək çəkidə rusiyalı Pyotr Yan və gürcüstanlı Merab Dvalişvili üz-üzə gəlib. Baxış duelində idmançılar arasında gərginlik olduğu üçün görüşün də maraqlı alınacağı gözlənilirdi.

Qarşılaşmanın əvvəlində bərabər səviyyəli mübarizə getsə də, sonradan vəziyyət dəyişib. Döyüşün gedişatında yumruq zərbələri və teykdaun cəhdlərini uğurla istifadə edən Merab hakimlərin yekdil qərarı ilə qalib elan olunub.

Bununla da, P.Yan UFC-də ardıcıl 3-cü döyüşündən məğlub ayrılıb. Daha əvvəl Şon Omelli və kəmərin sahibi Alcameyn Sterlinqlə bacarmayan 30 yaşlı Pyotr sonuncu dəfə 2021-ci ildə Kori Sendhageni məğlub etmişdi.

Ümumən isə rusiyalı idmançı MMA yarışlarında 21 görüşdə 16 dəfə qələbə qazanıb, 5 dəfə isə uduzub. Onu məğlub edən M.Dvalişvili isə UFC-də uğurlu seriyasını davam etdirir. Ardıcıl 9-cu qarşılaşmada qalibiyyətə sevinən Merab MMA turnirlərində 16-cı qələbəsini əldə edib.