Ulduz futbolçu Pol Poqbanın karyerasına ağır zərbə

Fransalı məşhur futbolçu Pol Poqba 4 illik diskvalifikasiya olunub.

Buna səbəb 30 yaşlı oyunçunun antidopinq qaydalarını pozmasıdır.

Belə ki, Pol Poqbanın 2023-cü ilin sentyabrında verdiyi dopinq testi müsbət nəticələnib. Araşdırmalardan sonra oyunçunun qadağan olunan maddə qəbul etməsi təsdiqini tapıb və nəticədə onu diskvalifikasiya etmək qərarı qəbul olunub.

Yayılan məlumata görə, Polun 2026-cı ilədək müqavilə ilə məxsus olduğu “Yuventus” klubu bu hadisədən sonra onunla sözləşməyə xitam verməyə hazırlaşır.

Qeyd edək ki, son illərdə zədələrdən əziyyət çəkən Pol Poqba 2022-ci ildən Turin təmsilçisində çıxış edirdi. Daha əvvəl 2012-2016-cı illərdə də “qoca sinyora”nın şərəfini qoruyan yarımmüdafiəçi karyerası ərzində A Seriyasında 4, İtaliya Kubokunda 2, Super Kubokunda isə 3 dəfə qalib gəlib.

Bir müddət “Mançester Yunayted”də də top qovan Pol Poqba 2 dəfə İngiltərə Liqa Kubokunu qazanmaqla yanaşı, 2017-ci ildə Avropa Liqasında qalibiyyətə sevinib. 2013-cü ildən çağırıldığı Fransa millisində 91 matçda 11 qol vuran Pol 2018-ci ildə Rusiyada keçirilən dünya çempionatında, 2021-ci ildə isə Millətlər Liqasında fəxri mükafata yiyələnib.