Ulu Öndər Heydər Əliyevin xatirəsinə həsr olunan karate seminarı keçirilib

Bakı İdman Sarayında ümummilli lider Heydər Əliyevin 100 illiyinə həsr olunan karate seminarı keçirilib.

Azərbaycan Karate Federasiyaları Assosiasiyasının təşkilatçılığı ilə baş tutan seminara qurumun prezidenti, millət vəkili, əməkdar idman ustası Ülvi Quliyev də qatılıb. Ümumən isə seminarda federasiya rəhbərliyi ilə yanaşı, 500-ə yaxın məşqçi və idmançı iştirak edib.

Təcrübəli məşqçilər və məşhur karateçilərlə yanaşı, gənc idmançıların da iştirak etdiyi seminarın təşkilində əsas məqsəd gənclərin sağlam həyat tərzinə marağını artırmaq, onların asudə vaxtının səmərəli təşkilinə kömək etməkdir.

Qeyd edək ki, karate millimizin üzvləri geridə qalan III Avropa Oyunlarında uğurlu nəticələrlə diqqət çəkiblər. İdmançılarımızdan Tural Ağalarzadə və İrina Zaretska qızıl medal qazanıblar. Asiman Qurbanlı isə yarışın bürünc mükafatına yiyələnib.