Bakıda Azərbaycan-Tacikistan biznes forumu keçirilib

“Biz Azərbaycan biznesini Tacikistanla ticarət-iqtisadi əlaqələri genişləndirməyə çağırırıq”.

Bunu iqtisadiyyat naziri Mikayıl Cabbarov Bakıda keçirilən Azərbaycan-Tacikistan Biznes Forumunda deyib.

Onun sözlərinə görə, bu il iki ölkə arasındakı ticarət dövriyyəsi 78% artıb.

M.Cabbarov bildirib ki, digər tərəfdən nəqliyyat-logistika sahəsində əməkdaşlıq üçün imkanlar mövcuddur: “Tacikistan Transxəzər Beynəlxalq Nəqliyyat Dəhlizindən aktiv şəkildə istifadə edir. Ötən il ərzində bu dəhliz üzrə daşınan yüklərin həcmində 86%-lik artım qeydə alınıb. Bu ilin 4 ayında isə yükdaşımaların həcmi 70% artıb”.

Nazir kənd təsərrüfatı məhsullarının emalı sahəsində layihələrə investisiyları nəzərdən keçirməyi məsləhət görüb.

“Sənaye zonaları qarşılıqlı maraqlar əsasında əməkdaşlıq üçün daha gözəl imkandır. Bakı Beynəlxalq Ticarət Limanı yaxınlığında olan Ələt Azad İqtisadi Zonası beynəlxalq investorlarla işgüzar təmaslara hazırdır, investorlara müxtəlif güzəştlər təklif edilir”, – o əlavə edib.