Banklara pul qoyuluşunu cəlbedici edən səbəblər | Əmanətlərin artması risklidirmi? - Baku TV

Azərbaycanda əhalinin banklardakı əmanətlərinin həcmi artıb.

Avqustun 1-nə olan məlumata görə, fiziki şəxslərin banklarda saxladığı vəsaitlərin ümumi məbləği 17 milyard 466,5 milyon manata çatıb. Bu, ötən ilin eyni dövrü ilə müqayisədə 15,6 faiz çoxdur. Eyni dövrdə bankların kredit portfeli isə 12,6 faiz artıb.

İqtisadçı Xalid Kərimli əhalinin əmanətlərinin artmasını ilk növbədə gəlirlərin yüksəlməsi ilə əlaqələndirir. Rəsmi statistikaya əsasən, 2026-cı ilin yanvar-iyul aylarında əhalinin nominal gəlirləri illik müqayisədə 10 faizə yaxın artıb.

Ekspert hesab edir ki, manatın məzənnəsinin sabit qalması da əmanətlərin banklarda yerləşdirilməsini vətəndaşlar üçün cəlbedici edir. Onun sözlərinə görə, depozitlər əhali üçün əsas investisiya alətlərindən biri olaraq qalır.

Xalid Kərimli bildirir ki, banklar cəlb etdikləri vəsaitləri kredit şəklində real və maliyyə sektorlarına yönəldir, həmçinin qiymətli kağızlara investisiya edirlər. Buna görə də bankların depozitlərə olan tələbatı onların vəsaitə ehtiyacından asılı olaraq dəyişir. Tələbat azaldıqda isə əmanətlər üzrə faizlər aşağı salına bilər.

İqtisadçı Eldəniz Əmirov da əmanətlərin kredit portfelindən daha sürətlə artmasının bank sektoru üçün risk yaratmadığını düşünür. Onun sözlərinə görə, kredit portfelinin daha yüksək templə böyüməsi üçün iqtisadiyyatda kreditə tələbat artmalı, eyni zamanda kredit şərtləri əhali və biznes üçün əlçatan olmalıdır.

Qeyd edək ki, sözügedən dövrdə fiziki şəxslərin banklardakı əmanətlərinin 71,7 faizi milli valyutada olub. Əmanət portfelinin 64,9 faizini isə müddətli əmanətlər təşkil edib.