Hasilata 2027-ci ilə qədər başlanılması gözlənilir - Baku TV

"Umid Babek Operation Company" əməliyyat şirkəti ilə "Caspian Oilfield Service" arasında "Neptun" özüqalxan qazma qurğusunun Xəzər dənizinin Azərbaycan sektorundakı "Ümid" qaz-kondensat yatağında fəaliyyətinin 2027-ci ilin sonunadək davam etdirilməsinə dair sənəd imzalanıb.

Bu barədə "Umid Babek Operation Company" məlumat yayıb.

Məlumata əsasən, hazırda "Neptun" qurğusu yatağın cənub qanadında mühüm qazma əməliyyatlarını icra edir.

Qurğu Azərbaycan Dövlət Neft Şirkəti ilə birgə "Ümid" yatağının tarixində ən dərin quyu hesab olunan, 7 min metrdən artıq dərinliyə malik sualtı qiymətləndirmə quyusunun qazılmasını davam etdirir.

Şirkətdən bildirilib ki, "Ümid" yatağının inkişafının növbəti mərhələsinə keçid fonunda "Caspian Oilfield Service" ilə əməkdaşlıq əldə olunan nəticələrin əsas dayaqlarından biri olaraq qalır.

Daha əvvəl "Fitch Ratings" beynəlxalq reytinq agentliyinin hesabatına əsasən, "Ümid" yatağının işlənməsinin ikinci mərhələsi çərçivəsində hasilata 2027-ci ilə qədər başlanılması gözlənilir.

SOCAR-ın ilkin qiymətləndirmələrinə görə, "Ümid" yatağının 7 layı üzrə ehtiyatları 129 milyard kubmetr qaz və 20 milyon ton kondensatdan ibarətdir.