Kreditləşmənin artmasının yaratdığı risk | Bankların nəzərinə

Azərbaycanın bank sektorunda göstəricilər yaxşılaşsa da, pərakəndə kreditlərin sürətli artımı risk yaradır.

Bu barədə “Fitch Ratings” beynəlxalq reytinq agentliyinin yaydığı hesabatda bildirilib.

Qeyd edilib ki, 2017-ci ildən bəri sektorun əsas göstəriciləri əhəmiyyətli dərəcədə yaxşılaşıb. Bununla belə, agentlik xəbərdarlıq edir ki, 2021-ci ildən pərakəndə kreditləşmənin sürətlə genişlənməsi sektor üçün risk yarada bilər.

Bu risklər əsasən istehlak kreditləri və ipoteka portfelinin sürətli artımı ilə əlaqələndirilir. Lakin sənəddə vurğulanır ki, Azərbaycan Mərkəzi Bankı sözügedən risklərin qarşısını almaq məqsədilə tənzimləmə tədbirləri həyata keçirir.

Qeyd edək ki, 2025-ci il iyulun 1-nə olan məlumata görə, Azərbaycan banklarının verdikləri kreditlərin 46,8 faizini istehlak və ipoteka kreditləri təşkil edib. Son bir ildə istehlak və ipoteka kreditlərinin həcmi 15,4 faiz artıb.