Məhsuldarlığı artırmaq üçün hansı addımlar atılmalıdır? - Muxtar Babayevdən açıqlama

“Azərbaycanda kənd təsərrüfatını iqlim dəyişikliklərinə uyğunlaşdırmaq üçün su və torpaq resursları səmərəli idarə olunmalı, suvarma sistemləri modernləşdirilməli, su itkiləri azaldılmalı və torpağın münbitliyi qorunmalıdır”.

Bu sözləri Prezidentin iqlim məsələləri üzrə nümayəndəsi Muxtar Babayev Bakıda keçirilən IV Aqrobiznesin İnkişafı Forumunda deyib.

“Eyni zamanda məhsuldarlığı artırmaq üçün quraqlığa, şoranlığa və istiliyə davamlı bitki sortlarının yetişdirilməsi və müasir aqrotexniki tədbirlərin tətbiqi mühüm əhəmiyyət daşıyır. Aqroparkların inkişafı ekoloji və iqtisadi cəhətdən dayanıqlı istehsalın təşkili ilə yanaşı, su, gübrə və pestisidlərin istifadəsində innovativ və bioloji üsulların tətbiqi ilə dəstəklənməlidir”, ‒ deyə o qeyd edib.

M.Babayevin sözlərinə görə, bu sahədə dövlət və özəl sektorun birgə fəaliyyəti vacibdir:

“Bu əməkdaşlıq çərçivəsində yeni texnologiyalar və rəqəmsal həllər tətbiq olunmalı və məhsuldarlıq artırılmalıdır”.