Ən çox hansı ölkəyə pul köçürmələri həyata keçirilib? – Mərkəzi Bankdan açıqlama

“Bu ilin I yarısında Azərbaycana birbaşa xarici investisiya qoyuluşu 3 milyard 222,5 milyon ABŞ dolları təşkil edib”.

Bunu Mərkəzi Bankın Statistika departamentinin direktoru Samir Nəsirov bildirib.

Onun sözlərinə görə, ölkəyə yatırılan investisiyalarda ilk 5 yerdə 806,3 milyon dollarla Böyük Britaniya, 628,7 milyon dollarla Türkiyə, 353,4 milyon dollarla Kipr, 226,6 milyon dollarla İsveçrə və 176 milyon dollarla İran qərarlaşıb.

Hesabat dövründə Azərbaycan xaricə 1 milyard 349,8 milyon dollar birbaşa investisiya yönəldib. Bu baxımdan ilk 5-likdə İsrail, Türkiyə, BƏƏ, Gürcüstan, ABŞ qərarlaşıb.

Belə ki, Azərbaycandan İsrailə 542,5 milyon, Türkiyəyə 177,4 milyon, Birləşmiş Ərəb Əmirliklərinə 156,3 milyon, Gürcüstana 77,6 milyon və ABŞ-yə 77,1 milyon dollar investisiya yönəldilib.

Mərkəzi Bank rəsmisi qeyd edib ki, Azərbaycanın İsrailə yatırdığı 542,5 milyon ABŞ dolları dəyərində investisiya Aralıq dənizində yerləşən İsrailin “Tamar” qaz yatağı layihəsi ilə bağlıdır. Bu ilin I yarısında Azərbaycana xaricdən 534 milyon ABŞ dolları, Azərbaycandan xaricə isə 238,2 milyon dollar pul köçürülüb.

Samir Nəsirovun sözlərinə görə, hesabat dövründə Azərbaycana Rusiyadan 213,1 milyon, Türkiyədən 87,8 milyon, ABŞ-dən 52,1 milyon, Böyük Britaniyadan 18,8 milyon və Birləşmiş Ərəb Əmirliklərindən 18,5 milyon ABŞ dolları daxil olub.

Bundan başqa, onun sözlərinə görə, yarım il ərzində ölkədən Türkiyəyə 68 milyon, ABŞ-yə 40 milyon, Rusiyaya 22,1 milyon, Gürcüstana 13,8 milyon və Böyük Britaniyaya 12,3 milyon ABŞ dolları köçürülüb.