Pərviz Şahbazov TDT-nin enerji nazirlərinin iclasında | Nələr müzakirə olundu?

Energetika naziri Pərviz Şahbazov Qırğızıstanın paytaxtı Bişkekdə keçirilən Türk Dövlətləri Təşkilatının enerji nazirlərinin dördüncü iclasında çıxış edib.

Təşkilata üzv və müşahidəçi ölkələrlə Azərbaycanın ticarət dövriyyəsinin ötən il 9 milyard dolları ötdüyü, bu ölkələrin iqtisadiyyatımıza 18,2 milyard dollar, Azərbaycanın isə bu dövlətlərə 20,3 milyard dollar investisiya qoyduğu bildirilib.

Həmçinin qeyd edilib ki, ötən il və bu ilin 8 ayında Azərbaycandan, Türkiyə və dünya bazarlarına 41 milyon ton neft və 37 milyard kubmetr qaz ixrac olunub. Bu il 25 milyard gözlənilən qaz ixracımızın 9,8 milyard kubmetrinin Türkiyəyə, 12,5 milyard kubmetrinin isə Avropaya tədarükü nəzərdə tutulur.

“Azərbaycan, Qazaxıstan və Özbəkistan arasında yaşıl enerjinin inkişafı və ötürülməsi sahəsində strateji tərəfdaşlıq haqqında Hökumətlərarası Saziş”in yaxın vaxtlarda imzalanmasının planlaşdırıldığı diqqətə çatdırılıb.

Müzakirələrdən sonra iclasın yekunlarına dair Birgə Kommünike imzalanıb. Sənəddə türk dövlətlərinin 15 noyabrda Bakıda keçiriləcək COP29 Enerji Günündə fəal iştiraka hazır olduqları əksini tapıb.