Qeyri-neft sektoru üzrə ixracatçı subyektlərin reytinqi açıqlandı - Baku TV

2026-cı ilin yanvar-fevral aylarında SOCAR-ın marketinq və iqtisadi əməliyyatlar idarəsi 27,4 milyon ABŞ dolları dəyərində qeyri-neft məhsulu ixrac edib.

Bu barədə İqtisadi İslahatların Təhlili və Kommunikasiya Mərkəzinin ixrac icmalının mart sayında bildirilib.

Vurğulanıb ki, hesabat dövründə həmçinin “SOCAR Polymer” tərəfindən 35,7 milyon ABŞ dolları dəyərində məhsul ixrac olunub. Bu da 2025-ci ilin iki ayı ilə müqayisədə 5,4 milyon ABŞ dolları və yaxud 17,8% çoxdur.

Bu dövrdə eyni zamanda SOCAR-ın qaz ixrac idarəsinin qeyri-neft ixracı 2,6 milyon dollar, “SOCAR CAPE” MMC isə 328,3 min dollar olub. Bununla da SOCAR-ın dörd müəssisəsi qeyri-neft sektoru üzrə dövlətə məxsus əsas ixracatçı subyektlərin reytinqində yer alıb.

Qeyd edək ki, 2026-cı ilin yanvar-fevral aylarında Azərbaycanın qeyri-neft-qaz sektoru üzrə ixracı əvvəlki ilin eyni dövrünə nisbətən 19,7% artaraq 580,1 milyon ABŞ dolları təşkil edib.