"Şahdəniz"dən hasil edilən qazın miqdarı açıqlandı

“Şahdəniz” yatağından indiyədək ümumilikdə 200 milyard kubmetr qaz çıxarılıb.

"BP-Azərbaycan"dan verilən məlumata görə, 200 milyardıncı kubmetr qaz 26 avqust 2023-cü ildə, yəni yataqdan ilk qazın çıxarılmasından 16,5 il sonra əldə olunub.

2006-cı il dekabrın 15-də əldə edilən ilk hasilat yatağın işlənməsinin 1-ci mərhələsinin başlanğıcı idi. O vaxtdan bəri “Şahdəniz mərhələ 1” qazı Azərbaycan, Gürcüstan və Türkiyə bazarlarına çatdırılıb.

“Şahdəniz” yatağının işlənməsinin növbəti mühüm mərhələsi “Şahdəniz 2” layihəsi 2018-ci ildən istismardadır. “Şahdəniz mərhələ 2” layihəsinin işə salınması Azərbaycana öz enerji tarixində ilk dəfə olaraq Avropanın əsas qaz təchizatçılarından birinə çevrilmək imkanı yaradıb. 2020-ci ilin dekabrından başlayaraq “Şahdəniz” qazı Avropa bazarlarına nəql olunur. “Şahdəniz mərhələ 2” çərçivəsində Cənub Qaz Dəhlizi vasitəsilə Türkiyə və Avropa bazarlarına ildə ümumilikdə 16 milyard kubmetr qaz təchiz edilir.

Hazırda “Şahdəniz” yatağından gündə orta hesabla 72,6 milyon kubmetr qaz hasil edilir.