Rublun bahalaşmasının ölkəmizə təsirləri | İqtisadçı məsələyə aydınlıq gətirdi

Rus rublu bahalaşmaqda davam edir. Əgər 2025-ci il yanvarın 1-də 1 ABŞ dolları almaq üçün 113 rubl ödəmək lazım idisə, indi buna görə 78,8 rubl kifayət edir. Həmçinin ilin əvvəlində 1000 rublu 16 manata dəyişmək mümkün idisə, hazırda bu məbləğ 22 manatdır.

Qeyd edək ki, Rusiya Azərbaycanın ən çox idxal həyata keçirdiyi ölkədir. Eyni zamanda Azərbaycana göndərilən pul baratlarının əsas hissəsi Rusiyanın payına düşür.

İqtisadçı Xalid Kərimli deyir ki, rublun bahalaşması Rusiyadan Azərbaycana göndərilən pul baratlarına təsir edir.

Belə ki, məzənnənin yüksəlməsi Rusiyadan ölkəmizə göndərilən pul vəsaitlərinin artmasına səbəb olub. 2025-ci ilin əvvəlində Rusiyadan Azərbaycana göndərilən 10 min rublu milli valyutaya dəyişəndə 160 manat almaq olurdusa, hazırda bu məbləğ 220 manatdır.

Ticarətə gəldikdə isə rəsmi göstəricilər rublun bahalaşmasının 2025-ci ilin ötən dövründə Azərbaycanın Rusiyaya ixracına artırıcı təsir etmədiyini deməyə əsas verir.

Belə ki, 2024-cü ilin yanvar-aprel aylarında Azərbaycanın Rusiyaya ixracı 325,5 milyon dollar olubsa, 2025-ci ilin eyni dövründə bu göstərici 322,9 milyon dollara enib.