SOCAR-ın dekarbonizasiya istiqamətində hədəfləri açıqlanıb

Qlobal iqlim dəyişikliyi probleminin aktuallığını nəzərə alan SOCAR özünün strategiyasında dekarbonizasiya və enerji keçidi hədəflərini müəyyənləşdirib.

Bu hədəflərə 2030-cu ilə qədər bütün əməliyyat sahələrində rutin məşəldə yandırılmanın sıfıra endirilməsi, 2022-ci ilin göstəricisi ilə müqayisədə 2030-cu ilə qədər birbaşa aktivlər üzrə hasilat istiqamətində emissiya intensivliyinin 30 faiz, korporativ emissiya intensivliyinin 30 faiz və ümumi emissiyaların həcminin 20 faiz azaldılması aiddir.

Qarşıya qoyulmuş vəzifələrə həmçinin 2035-ci ilə qədər hasilat bölməsində sıfıra yaxın metan hədəfinə, 2050-ci ilə qədər “xalis sıfır”a nail olmaq daxildir.

Bu məqsədlə SOCAR “TotalEnergies” şirkəti ilə birgə neft-qaz mədən ərazilərində dron əsaslı metan emissiyalarının aşkarlanması və həcminin ölçülməsi tədqiqatlarını aparır.

SOCAR həmçinin BP şirkəti ilə birgə Azərbaycanda qabaqcıl sənaye liderləri kimi Metan Rəhbər Prinsipləri çərçivəsində Qlobal Metanın Azaldılmasının İnkişafı təşəbbüsünü icra edir. SOCAR tərəfindən “Neft Daşları”nda karbon krediti mexanizmi əsasında sızmaların müəyyənləşdirilməsi və aradan qaldırılması layihəsi həyata keçirilir.

Emissiyaların azaldılması ilə yanaşı, SOCAR bərpa olunan enerji mənbələrinin inkişafına da sərmayə qoyur. Bu məqsədlə Birləşmiş Ərəb Əmirliklərinin “Masdar” şirkəti ilə əməkdaşlıq çərçivəsində şirkət günəş və külək enerjisi, eləcə də “yaşıl hidrogen” istehsalı üzrə bir sıra layihələr həyata keçirir.

Eyni zamanda SOCAR və BP şirkəti arasında birgə əməkdaşlıq nəticəsində Cəbrayıl rayonunda “Şəfəq” günəş enerjisi layihəsi icra olunmaqdadır.

Bundan əlavə, SOCAR və Səudiyyə Ərəbistanının “ACWA Power” şirkəti arasında Azərbaycanda "yaşıl gübrə" istehsalına dair əməkdaşlıq sazişi imzalanıb.

Eyni zamanda SOCAR “China Energy International Group Co.Ltd” şirkəti ilə əməkdaşlıq çərçivəsində Azərbaycan ərazisində bərpa olunan enerji layihələrini inkişaf etdirir.

Bütün bunlar SOCAR-ın fəaliyyət istiqamətlərini şaxələndirməklə yanaşı, ölkədə istixana qazı emissiyalarının azaldılmasına ciddi töhfə verir.