SOCAR-ın Heydər Əliyev adına Neft Emalı Zavodunun əsas məqsədi | Laboratoriya nəticələri açıqlandı
SOCAR-ın Heydər Əliyev adına Neft Emalı Zavodunun qarşısında duran əsas məsələlərdən biri istehsal olunan yanacağın keyfiyyət göstəricilərinin diqqətdə saxlanılmasıdır.
Bu baxımdan zavodun laboratoriyası ən son texnologiyaya uyğun cihazlar və yüksəkixtisaslı kadrlarla təmin edilib.
Həmçinin laboratoriya uyğunluq qiymətləndirən bir sahə olduğundan məhsulların keyfiyyətinin qiymətləndirilməsi və sınaq hesabatlarının təqdim edilməsi zamanı qərəzsizlik və tərəfsizlik ən vacib nüanslardır.
SOCAR-ın Heydər Əliyev adına Neft Emalı Zavodunun laboratoriya meneceri Günel Məlikzadənin sözlərinə görə, laboratoriya “Avro 5” dizel məhsullarının sınaqlarının həyata keçirilməsi ilə bağlı Türkiyə Akkreditasiya Agentliyinin (TürkAK) akkreditasiyasından keçib:
“Beləliklə, bu istiqamətdə aparılan bütün sınaq nəticələrinin beynəlxalq səviyyədə tanınması təmin edilib. Bu o deməkdir ki, nəinki ölkə daxilində, eyni zamanda ixrac proseslərində də Neft Emalı Zavodu laboratoriyası tərəfindən verilən sınaq nəticələri təmənnasız olaraq qəbul edilir və hər hansı üçüncü tərəfin nəzarətinə ehtiyac duymur”.