SOCAR-ın prezidenti ABŞ-Azərbaycan Ticarət və Biznes Konfransında iştirak etdi - Baku TV

SOCAR-ın prezidenti Rövşən Nəcəfin rəhbərlik etdiyi nümayəndə heyəti ABŞ-Azərbaycan Ticarət və Biznes Konfransında iştirak edib.

Konfrans çərçivəsində “İkitərəfli ticarətin və strateji əməkdaşlığın gücləndirilməsi” mövzusunda açılış sessiyası keçirilib.

Açılış sessiyasında çıxış edən SOCAR-ın prezidenti Rövşən Nəcəf 30 ildən çox müddətdə Azərbaycanla ABŞ arasında enerji sahəsində uğurla davam etdirilən əməkdaşlığın ölkəmizin enerji sektorunun inkişafına mühüm töhfə verdiyini bildirib.

ABŞ şirkətlərinin Azərbaycanın iri neft-qaz layihələrində iştirak edən ilk tərəfdaşlardan olduğunu söyləyən SOCAR-ın prezidenti bu əməkdaşlığın möhkəm təməlinin “Əsrin müqaviləsi”nin imzalanması ilə qoyulduğunu deyib.

Tədbirdə həmçinin enerji, texnologiya və maliyyə sektorları üzrə əməkdaşlıq imkanlarına dair bir sıra panel müzakirələr təşkil olunub.

SOCAR-ın vitse-prezidenti Əfqan İsayev “Enerji infrastrukturunun inkişafı və gələcəyin enerji sektoruna kapital axını” mövzusunda keçirilən panel sessiyasında çıxış edib.