SOCAR-ın prezidenti COP28 çərçivəsində görüşlər keçirib

SOCAR-ın prezidenti Rövşən Nəcəf BMT-nin İqlim Dəyişmələri üzrə Çərçivə Konvensiyasının Tərəflər Konfransının 28-ci sessiyası çərçivəsində bir sıra xarici şirkət rəhbərləri ilə görüşlər keçirib.

“Boston Consulting Group”un qlobal sədri Riç Lesserlə görüşündə şirkətlər arasında iqlim dəyişmələri, emissiya həcmlərinin qiymətləndirilməsi istiqamətlərində birgə layihələrin uğurla həyata keçirildiyi vurğulanıb. Görüşdə SOCAR-la “Boston Consulting Group” arasında Əməkdaşlıq proqramının icrası ilə bağlı müqavilə imzalanıb.

“Masdar” şirkətinin baş icraçı direktoru Məhəmməd Cəmil Əl Rəmahi ilə görüşdə birgə həyata keçirilən layihələrin Azərbaycanda istixana qazı emissiyalarının azaldılmasına, bərpaolunan enerji mənbələrinin inkişafına əhəmiyyətli töhfə verəcəyi qeyd edilib.

“Ernst & Young” şirkətinin qlobal sədrinin müavini Amy Brachio ilə görüşdə isə bərpaolunan enerji, rəqəmsallaşma, könüllü karbon bazarları sahələrində potensial əməkdaşlıq imkanlarına dair fikir mübadiləsi aparılıb.

Eyni zamanda, SOCAR-la Əbu-Dabi Milli Neft Şirkəti, həmçinin “Sirius” beynəlxalq holdinqi arasında Strateji Əməkdaşlığa dair Sazişlər imzalanıb.