SOCAR İstanbul aeroportunu yanacaqla təmin edəcək | Razılaşmanın detalları

Dövlət Neft Şirkətinin Tükiyədə fəaliyyət göstərən STAR neft emalı zavodu 2025-ci ildən başlayaraq hər il İstanbul aeroportuna 700 min ton aviayanacağın tədarükü ilə bağlı strateji tərəfdaşlıq elan edib.

“Trend”in xəbərinə görə, razılaşma üç il müddətini əhatə edir və dünyanın ən iri hava limanlarından biri üçün sabit və etibarlı yanacaq tədarükünün təmin edilməsi yolu ilə aviasiya sektorunu möhkəmləndirmək məqsədi daşıyır.

"Biz strateji əməkdaşlığımızdan qürur duyuruq, çünki bu, aviasiya sahəsini dəstəkləyən sədaqətimizi vurğulayır", – deyə şirkətdən bildirilib.

Qeyd edək ki, STAR neft emalı zavodu 2018-ci ilin oktyabrında fəaliyyətə başlayıb. Zavod ümumilikdə 6,3 milyard dollar investisiya hesabına inşa edilib. Həmin məbləğdən 3,3 milyard dolları kredit yolu ilə cəlb edilib. STAR Türkiyənin ən iri neft emalı zavodu hesab olunur, ölkənin neft məhsullarına olan tələbatının 18 faizini ödəyir. Bu yaxınlarda həyata keçirilən təmir işlərindən sonra zavodun istehsalatı 13 milyon tonu ötüb.