SOCAR istiqrazları üzrə ümumi qazanc 7 milyon ABŞ dollarını ötüb

Avqustun 1-də Dövlət Neft Şirkətinin İstiqrazları üzrə 1 milyon 125 min ABŞ dolları məbləğində 7-ci kupon ödənişi edilib.

“SOCAR Capital” şirkətindən verilən məlumata əsasən, SOCAR İstiqrazlarının nominal qiyməti 1000 ABŞ dolları, tədavül müddəti 5 il, illik gəlirliliyi 4,5 % təşkil edir. İstiqrazlar üzrə faiz gəlirləri rüblük qrafiklər əsasında ödənilir.

Bakı Fond Birjasında yerləşdirildiyi tarixdən indiyədək ən çox ticarət olunan korporativ qiymətli kağıza çevrilən SOCAR İstiqrazları sahiblərinin ümumi qazancı 7 milyon 875 min ABŞ dollarına çatıb. 5 ilin yekununda toplam gəlir 22,5 milyon ABŞ dolları təşkil edəcək. 21 aylıq müddət ərzində təkrar bazar əməliyyatları həcminin 35 milyon ABŞ dollarını üstələməsi və bağlanmış əqd sayının 520-ni ötməsi SOCAR İstiqrazlarına olan yüksək tələbatın göstəricisidir.

1 və 5 saylı “ASAN xidmət” mərkəzlərindən və Azərbaycandakı lisenziyalı bütün investisiya şirkətlərindən əldə edilməsi mümkün olan SOCAR İstiqrazları yüksək likvidliyə malikdir və qiyməti heç vaxt nominal dəyərindən – 1 000 ABŞ dollarından aşağı düşməyib.

SOCAR İstiqrazlarının növbəti kupon ödənişi noyabrın 1-də baş tutacaq.