SOCAR Kulevi terminalında yeni çənlər inşa edəcək | Detallar açıqlandı

Dövlət Neft Şirkətinin Kulevi terminalında neft məhsulları üçün 4 ədəd çənin tikintisi nəzərdə tutulur.

Bu barədə “Trend”in sorğusuna cavab olaraq SOCAR-dan bildirilib.

“Terminalda neft və neft məhsulları üçün əlavə 4 ədəd 20 000 m3 rezervuarların inşası ilə bağlı Mühəndislik, Satınalma və Tikinti təklifləri alınmış və hazırda texniki qiymətləndirmə mərhələsindədir”, – deyə şirkətdən məlumat verilib.

Qeyd olunub ki, 2024-cü il ərzində Kulevi neft terminalı vasitəsilə ümumilikdə 2,5 milyon ton yük aşırılıb:

“Bu göstəricinin 0,95 milyon tonunu Azərbaycan mənşəli, 1,55 milyon tonunu isə tranzit yüklər təşkil edib. Müqayisə üçün, 2023-cü ilin eyni dövründə terminal vasitəsilə aşırılan yük 2,16 milyon ton olub.

Beləliklə, 2024-cü ildə 2023-cü illə müqayisədə yük həcmində 349 min ton artım olub”.

Qeyd edək ki, SOCAR-ın idarə etdiyi Kulevi Terminalı və Dəniz Limanı 16 may 2008-ci il tarixindən fəaliyyətə başlayıb. Terminal karbohidrogenlərin və neft-kimya məhsullarının daşınması üçün nəzərdə tutulub. Göstərilən xidmətlərə dəmir yolu ilə karbohidrogenlərin və neft-kimya məhsullarının qəbulu, çənlərə daşınması, saxlanması, dəniz gəmilərinə yüklənməsi və liman qurğularının istismarı daxildir.