Türkiyə ilə ticarətdə yeni güzəştlər olacaq

Azərbaycan və Türkiyə arasında “Preferensial Ticarət Sazişi”ndə dəyişiklik edilməsi ilə bağlı imzalanmış protokol qardaş ölkədə qüvvəyə minib.

Bu barədə məlumat “Resmi Gazete”də dərc olunub.

Xatırladaq ki, 2020-ci il fevralın 25-də Bakıda imzalanan “Azərbaycan Hökuməti ilə Türkiyə Hökuməti arasında Preferensial Ticarət Sazişi”nin yenilənmiş variantına əsasən, tərəflər protokolda qeyd olunan malların ticarətində bir-birinə güzəştlər edəcək.

Əlavələrdə hər bir mal üçün azaldılmanın tətbiq ediləcəyi baza tarif dərəcəsi və yaxud əlavə gömrük rüsumu göstərilib.

Bundan başqa, Azərbaycan və Türkiyə arasında “Preferensial Ticarət Sazişi” çərçivəsində gömrük rüsumlarının qarşılıqlı olaraq azaldılacağı malların sayı artırılır. Beləliklə, 15 növ kənd təsərrüfatı və digər Azərbaycan və türk mənşəli pendir, çay, şəkər, meyvə-tərəvəz çeşidləri kimi mallara qarşılıqlı preferensial ticarət rejimi tətbiq edilir.

Sazişin məqsədi mallar üzrə tariflərin azaldılması və ya ləğvi, para-tariflərin və qeyri-tarif maneələrinin ləğvi, ticarətin genişləndirilməsi və təşviqi, ədalətli rəqabət üçün əlverişli şərt yaradılması, ticarətin davamlı artımı üçün proqnozlaşdırılan və təhlükəsiz mühitin yaradılmasıdır.

Protokol qüvvəyə mindikdən sonra iki ölkə arasında ümumilikdə 30 növ kənd təsərrüfatı və qeyri-kənd təsərrüfatı, həmçinin sənaye və digər malların güzəştli idxalı və ixracı həyata keçiriləcək.

Qeyd edək ki, Milli Məclis 2023-cü il iyulun 6-da sazişə dəyişikliyi təsdiqləyib.