VI "Yerli şirkətlərin tanıtım sərgisi"nin açılışı | “Global Media Group” tədbirin media tərəfdaşıdır

Bakıda 6-cı “Yerli şirkətlərin tanıtım sərgisi”nə start verilib.

Kiçik və Orta Biznesin İnkişafı Agentliyi və “Marsol Group”un birgə təşkilatçılığı ilə keçirilən, həmçinin “Global Media Group”un media tərəfdaşı olduğu sərgidə 300-ə yaxın yerli şirkətin məhsul və xidmətləri nümayiş olunur.

Açılışa həsr olunmuş tədbirdə çıxış edənlər ölkədə təşkil edilən sərgilərin “Made in Azerbaijan” brendinin tanıdılmasında oynadığı mühüm rolu barədə fikirlərini bölüşüblər.

Sərginin keçirilməsində məqsəd yerli şirkətlərin məhsul və xidmətlərini, xüsusilə də ilk dəfə bazara çıxarılacaq brendləri geniş ictimaiyyətə tanıtmaq, xarici bazarlara çıxış imkanlarını artırmaq və biznes subyektləri arasında qarşılıqlı faydalı əməkdaşlıqları təşviq etməkdir.

Sərgidə eyni zamanda KOBİA mikro və kiçik sahibkarlıq subyektlərinin ödənişsiz olaraq iştirakına dəstək göstərib. Bu məqsədlə qurulmuş ayrıca stenddə sənaye, tekstil, qida, xidmət, tikinti, əl işləri, parfümeriya və s. sahələrdə fəaliyyət göstərən 10 KOB subyektinin məhsul və xidmətlərini təqdim etməsi üçün şərait yaradılıb.

Qeyd edək ki, 6-cı “Yerli şirkətlərin tanıtım sərgisi” iyunun 21-dək davam edəcək.