2-ci Xəzər Beynəlxalq Nəqliyyat, Tranzit və Logistika Forumu keçirilib - Baku TV

“Azərbaycanda II Xəzər Beynəlxalq Nəqliyyat, Tranzit və Logistika Forumu keçirilir. Forumun əsas məqsədi nəqliyyat sahəsində fəaliyyət göstərən beynəlxalq təşkilatları, dövlət qurumlarını və özəl sektor nümayəndələrini bir araya gətirmək, qabaqcıl təcrübə mübadiləsini təşviq etmək, həmçinin nəqliyyat dəhlizlərində daşımaların daha səmərəli təşkilinə töhfə verməkdir”.

Bu fikirləri Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) Yük Daşımaları Departamentinin direktoru Sübhan Əbilov jurnalistlərə açıqlamasında bildirib.

Onun sözlərinə görə, Azərbaycanın əlverişli geosiyasi və coğrafi mövqeyi ölkənin mühüm tranzit potensialını formalaşdırır.

“Son illərdə həyata keçirilən islahatlar nəticəsində avtomobil nəqliyyatı ilə həm tranzit, həm də ikitərəfli yükdaşımalar sahəsində əhəmiyyətli irəliləyişlər əldə olunub. Azərbaycanda nəqliyyat sektorunda yaradılmış əlverişli şərait və müsbət biznes mühiti ölkəmizi xarici tərəfdaşlar üçün cəlbedici tranzit məkanına çevirib”, – deyə Sübhan Əbilov qeyd edib.