58 ölkənin nümayəndələri Gövhər Ağa məscidində oldular - Baku TV

Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura 2 günlük səfəri davam edir.

Nümayəndə heyəti əvvəlcə Xankəndidə olub, burada görülən işlərlə tanış olub. Daha sonra Şuşaya yollanıblar.

Səfərdə 58 ölkə və 9 beynəlxalq təşkilatdan 150 nümayəndə iştirak edir. Heyəti Azərbaycan Prezidentinin köməkçisi Hikmət Hacıyev müşayiət edir.

Şuşada nümayəndə heyəti Cıdır düzünü ziyarət edib, Azərbaycan musiqisi dinləyib və Vətən müharibəsində həlak olan şəhidlərin xatirəsini 1 dəqiqəlik sükutla yad edib.

Daha sonra Qarabağ küçəsi və Yuxarı Gövhər Ağa məscidi ziyarət olunub. Nümayəndələr küçənin bərpası və tarixi görkəminin qorunması ilə bağlı məlumatlandırılıblar.

Səfər çərçivəsində Azərbaycan muğam sənətinin görkəmli nümayəndəsi Sadıqcanın ev-muzeyinə də baş çəkilib. Daha sonra güllələnmiş heykəllər ziyarət olunub və onların tarixi barədə məlumat verilib.

Səfər sentyabrın 12-də də davam edəcək. Nümayəndə heyəti Ağdərə və Kəlbəcərdə görülən işlər və yenidən qurulan kəndlərlə tanış olacaq.